Vil bygga studentbustader med lågare standard

Me manglar over 13 200 studenthyblar i Noreg, og berre i Oslo står 3865 studentar i bustadkø. Regjeringa vedtok å auka utbygginga, men framleis går det for sakte. Fagdirektør for bustad i Forbrukerrådet, Thomas Bartholdsen, vil endra på krava for å bygga studentblokker. Ein grå tysdagsmorgon står han i ei rundkøyring nær Ullevaal Stadion og viftar med armane. Her vil han at studentar skal kunne bu.

– Sentrum er nesten utbygd, det er ikkje så lett å tenkja seg mange nye blokker der. Men om ein ser i Oslo og andre byar, finn ein fort tomter der det ikkje er interessant å bu permanent.

Desse tomtene har nokre fellestrekk. Dårleg utsikt, ein del støy og trafikk, mellom anna. Men dei er ofte nær utdanningsinstitusjonane – og egnar seg godt til studentblokker, meiner Bartholdsen. Målet er å gjera bygging av studentbustader til eit eige punkt i plan- og bygningslova.

– Umogleg etter dagens lovverk

Kommunal- og moderniseringsdepartementet (KMD) jobbar no med nye byggtekniske forskrifter, som skal vera klart til 2017, og er ansvarleg for plan- og bygningslova. Statssekretær Per-Willy Amundsen (Frp) fortel at departementet ønskjer å vurdera å endra krava for studentbustader – men ei slik lovendring kan ikkje komma utan vidare.

– Det å regulera for spesielle brukargrupper, som studentar, er umogleg etter dagens lovverk. Me har eit likebehandlingsprinsipp som har blitt fulgt i alle år, som kan setta spørsmålsteikn ved om dette er rett framgangsmåte, seier Amundsen.

Men han understrekar at departementet ser at det er mogleg å redusera krava.

– Eg har også blitt gjort merksam på nokre krav som blir stilt til bustader i dag, som ikkje nødvendigvis er naudsynte for studentar.

Unngår byråkratikverna

Thomas Bartholdsen gjekk ut med ønskjet om å lempa på krava for studentbustader i Dagsavisen i førre veke, og har fått god respons. Norsk studentorganisasjon (NSO), til dømes, jubla.

– Me har lenge ønska å gjera studentbustader til eit eige arealføremål i plan- og bygningslova. Det vil føra til at studentbustadene automatisk blir unntatt frå reglar som

ikkje blir sett på som relevante, sa NSO-leiar Therese Eia Lerøen til Dagsavisen.

Studentbustader kan også byggast med unnatak i reguleringsplanen etter dagens lovverk, men då må det gjennom det Bartholdsen kallar ei byråkratisk kvern.

– Men det tek tid og fordyrar heile prosessen. Heile poenget er eigentleg at ei raskare og meir effektiv utbygging av mange studentbustader vil gjera dei lettare å få tak i, seier Bartholdsen til Universitas.

Les også: Vil bygge 2200 studentboliger i året

Blir det trist?

Bilane køyrer konstant gjennom rundkøyringa på Ring 3, mellom Ullevaal Stadion og Nordnorske elev- og studenthjem. Av og til må me heva stemmene for å nå fram.

– Vil ikkje bråket vera forstyrrande i eksamenstida?

– Det er lett å flytta. Er du veldig oppteken av at det skal vera heilt stille, kan du til dømes bu på Kringsjå, seier Bartholdsen, som understrekar at aktuelle tomter må utgreiast.

– Men vil ikkje den samla summen av lågare krav senka levestandarden til studentane?

– Det blir lettare å bygga studentbustader om ein firer litt på desse krava. Alternativet for mange er å leiga privat – ofte nær ein trafikkert veg eller uteplassar, med dårleg utsikt og lysforhold, kanskje er det også brannfarleg.

Regeljungel

Lisbeth Dyrberg, administrerande direktør i Studentsamskipnaden i Oslo (SiO), støttar forslaget til Bartholdsen, og håpar på endringar i plan- og bygningslova.

– Det er eit komplisert regelverk som primært er utarbeida for ordinære bustader, me er opptekne av at det skal tilpassast det spesielle med studentbustader, seier Dyrberg.

I snitt bur studentar på ein hybel i 18 månader – då er ikkje uteareal og utsikt det viktigaste.

– Men det skal byggast med god kvalitet. Dei fleste som bur i store byar aksepterer litt fortetting og tek konsekvensen av det med lyd- og lysforhold. Men det er klart det må vera tilpassa, studentar skal også leva.