– Tilbodet til studentar viktigast

Torsdag skal den nye samskipnadslova behandlast i Stortinget. Den skal gje klarare rammer for kva aktivitet studentsamskipnadane skal drive med, og plikte alle høgare utdanningsinstitusjonar å tilby studentvelferdstenester i ein samskipnad. Einaste unnateke er nokre få private institusjonar som alt tilbyr velferd gjennom alternative institusjonar.

Forsknings- og høgare utdanningsminister Tora Aasland trur studentane vil tene på at det vert like reglar for alle.

– Vi ønskjer ei standardisering. Lova bør vere lik over heile landet, seier ho.

Per Anders Langerød, leiar i Norsk studentunion (NSU) er godt nøgd med den nye lova.

– Dette er ein siger for studentane, seier han.

Silje Winther, styreleiar i SiO, er og glad for tillita som vert synt til samskipnadane.

– Studentstyringa står sterkt, og syner at samskipnadar er ein god måte å løyse studentvelferd på, seier ho.

Avgrensar rolla

Ein av dei nye tilskota til lova er at den skal avgrense kva samskipnadane skal kunne tilby ikkje-studentar av velferdstenester mot betaling.

– Samskipnadane skal konsentrere seg om studentvelferd, og ikkje nødvendigvis om å tene pengar, seier Aasland.

Leiar i Kyrkje-, utdannings- og forskingskomiteen (KUF-komiteen), Ine Marie Eriksen Søreide (H) er skeptisk til ei slik avgrensing.

– Dette er med å finansiere studentvelferda. Om dette ikkje er tilgjengeleg, er det ikkje sikkert samskipnadane kan gje studentane eit like godt tilbod, seier ho.

Silje Winther fryktar at tilliten til samskipnadsstyret vert undergreve.

– Studentane har fleirtal i styret, og er restriktive på kommersiell aktivitet. Vi veit kva oppgåva vår er, understrekar ho.

– Der har vore noko aktivitet som har vore på kanten av kva den skal vere, og tilbodet har vore i overkant, forklarer Aasland.

Ho trur skipnadane vil ha godt av å avgrense aktiviteten.

NSUs ankepunkt

Gjennomgåande skal lova regulerast vidare gjennom forskrifter. Dette er Langerød i NSU sitt einaste ankepunkt mot lova.

– Det gjer det vanskeleg å spå kva som kjem, seier han.

Aasland forsikrar at dette ikkje skal vere tilfelle.

– Vi vil så fort som råd, og i samråd med studentorganisasjonane, få fastlagd dei nødvendige forskriftene, seier ho.

Etterlyser frivilleg medlemsskap

Studentar som idag ikkje er medlem i samskipnaden, får ikkje ta eksamen. Anders Anundsen (Frp), medlem i KUF-komiteen, er nøgd med lova, men etterlyser frivillig medlemsskap.

– Det burde vere mogleg å reservere seg, om samskipnadar tek på seg ei politisk rolle. Det har skjedd før, og kan hende skjer det igjen, seier han.

Aasland lovar at om samskipnadane bryt lova, er det hennar jobb å rette det opp. Ho trur frivillig medlemsskap vil undergrave heile samskipnadstankegangen, og meiner det er nødvendig at alle behandlast på same måte.

– Samskipnadane har eit kjerneoppdrag, og det er dette studentane betalar ein kontingent for å få dekka, understrekar ho.