– Bryt mållova
Ikkje ein gong éin prosent av papirskriv på under 10 sider er på nynorsk ved Universitetet i Oslo, syner ein rapport frå Språkrådet. Kravet er ifølgje mållova på 25 prosent.
– Dei språklege prioriteringane til dei offentlege organa er heilt forkastelege, seier Jon Grepstad, informasjonsrådgjevar i Språkrådet.
Rapporten Språkrådet nettopp har kome med, syner at av totalt om lag 160 statsorgan, fylgja berre 35 mållova i 2006. Av alle papirskriv på under 10 sider, ligg Universitetet i Oslo (UiO) på eit botnnivå med berre 0,3 prosent nynorsk. Samstundes kan dei syne til ein prosentandel på heile 26,1 prosent nynorsk i skriv på over 10 sider. Grepstad er likevel ikkje nøgd:
– Det er ikkje tvil om at tala for nynorskprosent ved UiO framleis er alt for låge, seier han.
– Bryr seg ikkje
– UiO tek ikkje inn over seg at det er ein rett for nynorskstudentar å møte språket sitt, seier Astrid Marie Grov, leiar i Studentmållaget i Oslo.
Ho trur grunnen til dei låge tala er lita vilje til bruk av nynorsk, samt liten kunnskap i nynorsk rettskriving.
Sylfest Lomheim, leiar i Språkrådet, er einig med Grov i dette.
– Systemet rullar og går utan at nokon bryr seg, seier han.
Kommunikasjonsdirektør ved UiO, Siv Nordrum, er lei for at UiO held fram med å bryte mållova.
– Dette får vi dårleg til. Og slik har det vore lenge. Men det er vanskeleg å få tilsette til å skrive på nynorsk, seier ho.
Lomheim tilbyr ei løysing på rettskrivingsproblema.
– Språkrådet sendar gjerne rettleiarar til UiO. Dei kan svare på alt som har med språkbruk å gjera, informerar han.
Tøffe krav
Nordrum ynskjer alle tilbod velkommen, men ho trur ikkje fråveret av nynorsk skuldast mangel på vilje.
– Sjølvsagt vil vi følgje norsk lov, men i ein travel kvardag kjem kravet om jamstilling mellom bokmål og nynorsk som enda ei oppgåve det ikkje vert tid til. Nynorsk vert nedprioritert.
– Kva er det som tek så mykje tid?
– Mellom anna vert krava til internasjonalisering stadig tøffare, og UiO møter kritikk for å vere for dårlege på engelsk. Dette er derfor eit felt som vil vere mykje i fokus i tida framover.
– Korleis trur du dette fokuset på engelsk vil påverke omsynet til mållova?
– Det veit eg ikkje, men det eg kan seie er at akkurat no er omsynet til engelsk like presserande, seier Nordrum.
Grov tykkjer ikkje fokuset på engelsk treng å gå utover omsynet til nynorsk, og er ikkje nøgd med prioriteringa til UiO
– Dette er ei billig orsaking, seier ho.
– Ikkje eit provinsuniversitet
Nordrum ser det også som ei utfordring at UiO ligg på ein stad der det ikkje er vanleg å skrive nynorsk.
– UiO ligg jo i det tjukkaste bokmålsområdet i landet, seier ho.
Grepstad tykkjer ikkje dette er gode orsakingar, men går med på at det er enklare for universitetet i Bergen å følgje lova på grunn av området det ligg i.
– UiO har eit stort ansvar som det største universitetet i Noreg, og dei pliktar å følgje mållova sjølv om dei er opptekne med mykje anna.
Grov er einig med Grepstad:
– UiO må slutte å tru at dei er eit provinsuniversitet for det sentrale austland,
seier ho.
