Dersom universitetet vert tatt ut i streik på torsdag, kan avgangsstudentane ved odontologi sjå langt etter autorisasjon som ferdige tannlegar.

2010-05-26

– All klinisk undervising vil verte stansa, og om lag femti prosent av dei munnlege eksamenane vil ikkje la seg gjennomføre, seier odontologidekan Pål Brodin.

Dersom lønnsforhandlingane i årets hovudoppgjer ikkje fører fram, kan det føre til at 171 tilsette ved Universitetet i Oslo vert tatt ut i streik frå torsdag denne veka. Det er avgjort at det er tilsette ved opptakskontoret sentralt og Det odontologiske fakultet som vert tatt ut. Størsteparten av desse er Unio-medlemar som er tilsette ved Institutt for klinisk odontologi.

– Det er heilt klart at avgangskullet vil verte ramma av ein streik. Vi vil ikkje kunne gjennomføre dei avsluttande eksamenane, og dermed vil studentane heller ikkje få autorisasjonen sin som tannlegar, seier Brodin.

Meklinga i hovudoppgjeret i staten har frist til klokka 24.00 natt til torsdag 27. mai. Ved odontologi hadde dei tysdag møter blant anna med studentrepresentantar og fagansvarlege for å informere om kva som kan kome til å skje.

– Det var stressa tendensar i kantina i dag når ein forstod kva konsekvensane kom til å verte, seier Ragnhild Henriksen, leiar i studentutvalet ved Det odontologiske fakultet. Henriksen meiner at den største konsekvensen av ein streik vil vere at klinikkane stenger for studentane. Dei får dermed ikkje utføre klinisk arbeid.

– Vi håper sjølvsagt at det ikkje vert streik. Til dømes er det eitt kull som har praktisk eksamen over to dagar denne veka, og dei kan då risikere og måtte ta halvparten av eksamenen no, og neste i sommar eller neste semester. Og denne eksamenen er påkrevd for å utføre klinisk arbeid på pasientane, som dei skal starte med til hausten, seier Henriksen.

Dersom det blir streik så vil det bli arrangert eit allmøte på torsdag, der meir informasjon for studentar og tilsette vil kome.

– Dersom det er teknisk mogleg, vil vi forsøke å avvikle eksamenar i løpet av juli. Vi vil strekke oss langt for å få gjennomført eksamenar for avgangskullet, seier Brodin.

Men om det blir streik eller ikkje, er endå vanskeleg å seie.

– I morgon natt er fristen, og det er jo ein viss tradisjon for at forhandlingar går på overtid. Partane sit framleis i forhandlingar, og eg kan ikkje sei noko meir på dette tidspunktet, seier Gro Jorunn Holmen, infoansvarleg i Unio.

Anna Werenskjold