NYnorsk: I Universitas nr. 4 2011 skriv Kristian Lødemel at Studentmållaget i Oslo (SmiO) er «til meir skade enn gagn». Han meiner at SmiO held på mytane om at ein nynorskbrukar er vegetarianar, homofil, medlem av SU, EU-motstandar, osv.

SmiO har representantar frå alle desse «grupperingane», men Lødemel viser eit for snevert bilete. Me er stolte av mangfaldet i laget, og i dei siste styra har me medlem som studerer på BI og røystar Høgre.

SmiO har plass til alle. Du treng ikkje forsvara andre mindretalsstandpunkt for å skriva eller arbeida for nynorsk, men det er vanleg at dei som fyrst er engasjert i éin organisasjon, er engasjert i fleire.

Som språkorganisasjon tek me imot alle som vil stø og hjelpa oss i arbeidet for nynorsken. Fleire medlem skriv bokmål, men vert ikkje mindre medlem av den grunn. SmiO ynskjer å ha med folk som Lødemel, som kan bidra med fleire perspektiv på målsaka, og som har vilje til språk.