Bruk nynorsk data på UiO!

I fjor vår søkte rektor Arild Underdal om å sleppa kravet om minimum 25 % nynorsk. Kravet vart grunngjeve med at UiO ligg på Austlandet – bokmålsbrukarar treng ikkje skriva nynorsk til einannan innanfor same institusjonen.

Rektor gløymde her at UiO er ein viktig nasjonal samfunnsinstitusjon, og som eit offentleg organ lyt det sjølvsagt fylgja lov om målbruk i offentleg teneste. Mange studentar som kjem til UiO, byter til bokmål av di det dominerar so totalt her. Nynorskbruken ligg so vidt i overkant av fem prosent når det gjeld rundskriv og elektronisk informasjon. Viser ikkje det at UiO hev eit stort betringspotensiale?

No finst det eit glimrande høve for UiO: Gje alle nye og gamle studentar tilbod om nynorsk programvare! Microsoft Office hev kome i nynorsk utgåve. Alle bør kunna velja kva slag programvare dei vil ha når dei loggar seg inn. Dette vil vera eit fyrste, men viktig steg på veg mot språkleg jamstelling.